Çfarë të vizitosh në Romë në një ditë

Thuhet se për Romën nuk mjafton një jetë. E vërtetë, por edhe një ditë e mirëplanifikuar mjafton për t'u dashuruar me të. Sekreti është të zgjedhësh mirë, të ecësh në këmbë dhe të mos e mbushësh ditën me radhë para muzeve. Ky është itinerari që ndjekim në turin tonë njëditor me avion nga Tirana.

Mëngjesi: Roma antike

Dita nis te Koloseu, sa më herët aq më mirë, kur drita është e butë dhe turmat ende të pakta. Edhe nga jashtë, amfiteatri i madh i perandorëve Flavianë të lë pa frymë. Pranë tij ngrihet Harku i Kostandinit, dhe pak më tej shtrihet Forumi Romak, qendra e jetës politike dhe fetare të Romës së lashtë, me tempujt, rrugën Via Sacra dhe harqet triumfale.

Nga Kodra e Kapitolit, mbi Forumin, shihet një nga panoramat më të bukura të qytetit. Sheshi i Kapitolit, i projektuar nga Mikelanxhelo, të çon drejt Piazza Venezia-s dhe monumentit të bardhë të Vittoriano-s, që romakët me humor e quajnë «makina e shkrimit».

Fontana e Trevit: monedha hidhet me dorën e djathtë mbi supin e majtë.

Mesdita: zemra barok e qytetit

Duke ecur nëpër rrugicat e qendrës arrijmë te Fontana e Trevit, kryevepra barok e përfunduar në vitin 1762. Tradita thotë se kush hedh një monedhë në ujë, do të kthehet në Romë. Pak minuta më tej ndodhet Panteoni, tempulli i rindërtuar nga perandori Hadrian rreth vitit 125: kupola e tij prej betoni, me një vrimë të hapur në qendër, është ende më e madhja në botë e këtij lloji pa armaturë.

Panteoni në Piazza della Rotonda, një nga ndërtesat antike më të ruajtura në botë.

Pas Panteonit, Piazza Navona: sheshi i gjatë ovale ruan formën e stadiumit të perandorit Domician, dhe në qendër të tij Fontana e Katër Lumenjve e Berninit tregon Nilin, Gangun, Danubin dhe Rio de la Platën. Është vendi ideal për të ndaluar, për të parë artistët e rrugës dhe për të vazhduar drejt Campo de' Fiori për drekë.

Pasditja: Shkallët Spanjolle dhe blerjet

Pas drekës ecim drejt Piazza di Spagna dhe Shkallëve Spanjolle, 135 shkallë të ndërtuara në shekullin XVIII që ngjiten drejt kishës Trinità dei Monti. Kujdes: sot nuk lejohet të ulesh mbi to. Përreth shtrihen rrugët e modës, Via Condotti dhe Via del Corso, ku mund të kalosh pak kohë të lirë para nisjes drejt aeroportit.

Po Vatikani?

Sheshi dhe Bazilika e Shën Pjetrit janë të hapura edhe të dielën dhe hyrja në bazilikë është falas, ndërsa Muzetë e Vatikanit dhe Kapela Sistine janë të mbyllura të dielave (përveç të dielës së fundit të muajit). Nëse doni t'i shihni, ju rekomandojmë një tur të personalizuar në një ditë tjetër të javës. Të dielën në mesditë, kur Papa është në Romë, në shesh mund të ndiqet edhe lutja e Engjëllit të Zotit.

Këpucë të rehatshme, një shishe uji që e mbush te çezmat publike dhe pak monedha për fontanën: kjo është gjithçka që ju duhet. Pjesën tjetër e bën Roma.